Ich wünsche mir weichi, dicki, warmi, roti Socke für chalti Winterfüess

Wünschen und BegEHREN

D’Gschicht vom Wunsch- und Begehrbaum. Jedes Wese hät en eigne und si hanged voll vo chline Nüüteli.

Die einte Mänsche gsehnd dä Baum und nämed eis vo däne zaubrige Nüüteli und gönd hei demit. Det pflägeds das wundersame Gwächs und planged, bis es as Liecht chunt und sis Gheimnis pris git. 

Die andere, wo de Baum nid gsehnd, däne laat er sones Nüüteli uf de Chopf oder grad in Chopf ine falle. Anderne fallts in Buuch, is Herz, i d’Füess oder Bei, i d’Händ oder eifach vor de Wäg – in Wäg?

Mängmal märkt frau das na lang nid. Aber si wärded immer grösser, die zauberhafte Baumfrücht. Si chlöpfeled und chlopfed i eus ine – du Frau, he du, ich bin da, lueg mi mal a.

Die einte gsehnd us wie öppis Gschpunnes – nei, das gits ja nid! Die andere wie chlini Glaschugle, ganz durchsichtig. Was häts ächt da drin? Was, wänn die emal gross sind?  

Will ich die überhaupt? Ha im Momänt gar kä Zyt für so öppis. Ha doch öppis anders welle, öppis Vernümftigs, öppis Gschiiiiits! So lönd mi doch in Rueh!

Aber ebe, wies d’Wünsch und s’Begehre halt eso händ. Öper in Rueh laa, das känneds nid. Sie wachsed und wachsed und wänd gseh wärde, wänd ihren Platz i eusem Läbe. Sie lönd sich nid vertriebe. Viellicht emal echli vergässe, vergrabe.

So ladet mir zum Verzelle vo eusem Wunsch- und Begehrbaum.

14. Dezember 2026, Online 19 – 21 Uhr 

Ein Geschenk der fem!

Eine Übersetzung in die Schriftsprache bei: bachfrau@fem-fakultaet.net